Рэжым вымусіў яшчэ аднаго закладніка каяцца на камеру

Аляксей Кудзін, заслужаны майстар спорту Беларусі, пяціразовы чэмпіён свету па тайскім боксе, трохразовы чэмпіён свету па кікбоксінгу і пераможца адкрытага чэмпіянату Расіі па ММА. 10 жніўня 2020 года, падчас масавых пратэстаў супраць сфальсіфікаваных вынікаў прэзідэнцкіх выбараў у Беларусі, Кудзіна затрымалі. Па версіі міліцыі, падчас затрымання ён аказаў актыўны супраціў. Аднак абарона Кудзіна сцвярджае, што пры затрыманні ён быў «жорстка збіты».

Да 21 жніўня 2020 года Кудзіна трымалі пад адміністрацыйным арыштам, затым перавялі пад хатні арышт да суду. Кудзін здолеў уцячы да сваіх сяброў у Маскву. Аднак у студзені 2021 года яго арыштавалі на запыт беларускага боку і змясцілі ў СІЗА.

22 ліпеня 2021 года Кудзін быў экстрадаваны ў Беларусь, нягледзячы на тое, што Еўрапейскі суд па правах чалавека ўжыў забеспячальныя меры і забараніў яго выдачу. Кудзіну пагражае да 5 гадоў пазбаўлення волі.

23 ліпеня праўладныя каналы распаўсюдзілі «пакаяннае» відэа з удзелам Аляксея Кудзіна, дзе ён просіць прабачэння ў пацярпелых ад яго дзеянняў «праваахоўнікаў», кажа, што «ў СІЗА №1 ёсць усе выгоды, ем, нармальна сплю» і што не падтрымлівае разбурэння Беларусі. Раней гэтыя ж каналы транслявалі «інтэрв’ю» яшчэ аднаго закладніка рэжыму – журналіста Рамана Пратасевіча.